الأحد، 25 ديسمبر، 2011

على صوتك ( 2 )




* استكمالا للتعبير عما يدور من حولى بصفتى الشخصية وطريقتى الساخرة من باب شر البلية ما يُضحك ، لا أقلل مما نحن فيه وإنما أعبر بما هو أضعف الإيمان .  

أعبر عن الاسلاميين بلفظ المتقدمين وغيرهم من الأحزاب بلفظ المتأخرين وهذا بالطبع حسب نجاحهم فى الانتخابات .

ساويرس ساب المحمول خايف عالمينى جيب يطول وعايز الخمر يفضل على طول .. قول قول مهما يكون الإسلام أفضل للكون . 

أقول للمتأخرين قِله قِله حتفضلو قِله ، الشعب المسلم مش قِله ، ولو مش عاجبكم اضربو بالقُله .

المتأخرين يبررون عدم نجاحهم يقولون ..

 - الشعب عينه مزغلله طلع من الضلمه عالنور معنى كده إنكم ما بتنجحوش إلا فى الضلمه .

- الشعب فى سنه أولى سياسه خلاص اصبرو الدورة اللى جايه حنكون فى سنه خامسه يمكن ننتخبكم .

- الشعب أمى وغير واعى خلاص غيرو الشعب بآخر يكون مثقف وواعى عشان ينتخبكم .

- المتقدمين سيطروا عالأصوات بكياس سكر صحيح بقى إن المصريين زى الشربات .

الإعلام والمتأخرين لسه بيمارسوا نظام الفزاعات ناسيين إن الشعب المصرى طلع مش بيخاف .

ليه الشعب اختار المتقدمين على الأقل دى ناس بتعرف ربنا ومش حتسرق فلوس البلد .

تهنئة لحزب النور على دخول الحياة السياسية ونجاحه فى الإنتخابات وحصوله على كرسى الإتهام ببرامجنا الحواريه .

أقترح إن مبارك وأعوانه يظهروا فى البرامج الحواريه بعد كام حلقه هما اللى حيطالبوا بالإسراع بمحاكمتهم .

ليه مبارك وأعوانه متجمعين فى سجن واحد طبعا علشان يفكروا مع بعض إزاى يكفروا عن ذنبهم ويصلحوا حال البلد .

 إنفراد حصرى للثورة المصرية بدأت بشباب الإنترنت وانتهت بشباب الشوارع .

تميزت مصر وتصدرت دول العالم فى لعبة عسكر وحراميه أصلها اللعبه الوحيده اللى بتلعبها صح .



اللهم الحرية والنصر لمصر ..

الجمعة، 2 ديسمبر، 2011

علِى صوتك ( 1 )






هذه كلمات من حياتى .. كانت تصرخ فى أعماقى 

وضعتها على صفحتى .. لتعبر عن وجهة نظرى 

فيما يدور من حولى .  

خلع السِنه يحتاج لحظات خلع الرئيس يحتاج لسنه .. وأكثر .

سؤال لصالح وبشار : اختر مما بين الأقواس ( تسافر ، تتحاكم ، تتقتل ، جميع ما مر ) .

متحكمى العرب لا يسمعوا ولا يروا ولا يتكلموا ، ألم يكن القذافى يردد .. من أنتم !؟

 الحكومه السابقه ربت البلطجيه وقلة النظام والنظافه ، وماكانت تتوقع إنها تربى شهداء وشعب ثورى وسياسى .

 النظام السابق خلف بعده بلطجيه وفلول وسلفيون .

ما العلاقه بين الفلول والسلفيون و السياسه ؟ الفلول راحت عليهم والسلفيون بانت عليهم .

السلفيون قبل الثورة كانوا قطط بعد الثورة أصبحوا أسود .. بالعه تعالب . 

تلميحات النور للحريه والعدالة فى قنواتهم .. زى طالب فى سنه أولى بيقول لطالب فى السنه السادسه قوم وأنا أقعد مكانك .

* مع الإعتذار للصالحين منهم .

 المصريون وقفوا فى طوابير الإنتخابات على أمل إنهم يترحموا من طوابير العيش والغاز .

 شعارنا بعد الثورة : اتحكم فى الحكومه الجديده قبل ما تتحكم فيك . 

منظمه ناعمه هادئه .. طوابير بلدنا .. عندما تُعشق الإنتخابات .

سؤال يدور فى ذهن كل منتخب .. هى فين البلطجيه !؟

الآن .. وراء كل منتخب رأى عظيم .. قديما .. وراء كل منتخب بلطجى صميم .

ما العلاقه بين الفول والفلول ؟ الاتنين بنقول ربنا يتوب علينا منهم .










* تهنئة لحزب الحرية والعدالة على النجاح الطيب فى المرحلة الأولى والله الموفق .